A Xunta de Goberno do Concello de Vigo deron este venres a súa conformidade ao proxecto para reformar a Avenida de Madrid, unha das principais vías de acceso á cidade desde a meseta e Portugal, e en cuxas obras, que comezarán a principios do ano que vén, investiranse 16,8 millóns de euros. Segundo confirmou o alcalde, Abel Caballero, nunhas declaracións gravadas e remitidas aos medios, “o proxecto é acorde co que expón o Concello”, que xa está no proceso preparatorio da licitación. Os traballos serán cofinanciados polo Ministerio de Transportes e Mobilidade Sustentable que, ademais de pagar o proxecto, achegará 11,2 millóns á execución.

Segundo avanzou Abel Caballero, as obras comezarán “inmediatamente despois” do próximo Nadal, e permitirán integrar ese viario “como unha gran avenida da cidade”, con máis permeabilidade peonil, nova estética e con “un modelo de humanización no máis alto nivel”. Por outra banda, o rexedor informou tamén de que a Xunta de Goberno aprobou o modificado do proxecto de construción do novo parque de bombeiros de Esturáns. Cos cambios, que inciden en melloras de mantemento, seguridade e operatividade, o custo da nova instalación elévase a máis de 3 millóns de euros. A obra estará acabada, segundo o alcalde, “en 6 meses”.

BIBLIOTECA DO ESTADO

Finalmente, Caballero tamén detallou que o goberno municipal aprobou provisionalmente o plan de infraestruturas e dotacións para a Biblioteca do Estado, que se construirá nos terreos situados detrás dos antigos xulgados da rúa Lalín. Segundo explicou, agora abrirase un proceso de información pública e, unha vez que o reciba, a Dirección Xeral de Urbanismo da Xunta ten 3 meses para emitir o preceptivo informe. O alcalde remarcou que o Goberno investirá nesa dotación 22 millóns de euros, a pesar de que a Xunta “se segue opondo e tenta parala”. “Axiña estea o visto e prace pedirei unha entrevista co ministro de Cultura para ultimar o investimento”, concluíu.