InicioSociedadeSindicatos chaman aos vigueses a manifestarse o sábado por un transporte público...

Sindicatos chaman aos vigueses a manifestarse o sábado por un transporte público digno ante o “abandono” municipal

Afean a empresa e goberno local que se poñan "de perfil" ante a deterioración do servizo e o conflito laboral.

PUBLICADO O

Os responsables comarcais dos sindicatos CIG, CC.OO., UGT e USO fixeron este xoves un chamamento á cidadanía de Vigo e a súa área para manifestarse o sábado en demanda dun transporte público de calidade, no marco dunha folga indefinida do persoal da concesionaria do servizo (Vitrasa), e afearon o “abandono de responsabilidades” tanto da empresa como do goberno municipal ante un conflito que se alonga desde hai 3 anos e que se agravou nos últimos 90 días cunha folga indefinida.

A manifestación sairá ás 18,30 horas da Praza de España e percorrerá Gran Vía, Urzáiz e Colón, para acabar no cruzamento de Colón e Policarpo Sanz. O responsable comarcal da CIG, Alberte Gonçalves, subliñou que, ademais do conflito laboral na empresa, “está en xogo a calidade dun servizo público esencial” e que, xa antes da folga, estaba “recortado e precarizado”. A iso súmase que, nos últimos tres anos, o prezo do billete subiu un 16 %, mentres os salarios dos traballadores levan conxelados desde 2020.

Segundo Gonçalves, a pesar da vontade do comité por desbloquear o conflito, a dirección insiste en non mover ficha, e coa “complicidade” do Concello emprendeu unha “campaña de criminalización” dos traballadores. Na mesma liña, a secretaria comarcal de CC.OO., Montserrat Carrera, censurou que, ante este conflito e o empeoramento do servizo, tanto Vitrasa como o Concello “póñense de perfil” porque para eles “non é prioritario” un transporte que utilizan a diario miles de cidadáns.

“ABANDONO DE RESPONSABILIDADES”

O secretario comarcal de UGT, Ernesto Fontanes, criticou o “abandono de responsabilidades” por parte da empresa e do goberno municipal, e subliñou que é “inédito” que unha folga nun servizo público dure 90 días mentres o titular do devandito servizo, o Concello, “mira para outro lado”. Fontanes lembrou que, ademais do persoal, que sofre o conflito “de maneira brutal”, miles de usuarios do transporte ven como fai catro anos que “se está dinamitando” o servizo, con recorte de liñas, de frecuencias, e outras diminucións.

A responsable de USO-Vigo, Teresa Pérez, puntualizou tamén que o Concello ten a responsabilidade de controlar que Vitrasa cumpre o prego de concesión do servizo, e recalcou que, cando se aprobou a prórroga da concesión en plena pandemia de Covid, administración e empresa xa coñecían os problemas económicos derivados das restricións de viaxeiros. Para esta portavoz sindical, a actual situación do bus urbano de Vigo e a “pasividade” do Concello supoñen crear “un caldo de cultivo” ideal de cara á próxima licitación do concurso do bus urbano para rebaixar as condicións e empeorar o servizo.

Finalmente, Benigno Caride, da FSC de CC.OO., sinalou que traballadores e empresa levan 3 reunións con mediación do AGA sen que Vitrasa acceda a aplicar as subidas reclamadas para pór fin á folga (do 3 % en 2021 e do 3 % en 2022), unhas subidas que nin sequera compensan a metade da subida do IPC neses anos. “E a empresa e o alcalde seguen dicindo que pedimos a lúa”, lamentou.

ÚLTIMAS

Estudantes de Vigo e Monforte álzanse con tres premios da competición educativa Young Business Talents

Dous equipos de alumnado do IES San Tomé de Freixeiro (Vigo) e un grupo...

A concelleira do PP de Vigo Irene Garrido presenta a súa renuncia para centrarse na súa actividade no Congreso

A concelleira do PP de Vigo Irene Garrido presentou este venres a súa renuncia...

O BNG promete ser “a primeira liña de defensa” de Vigo no Parlamento galego, fronte ao “abandono” da Xunta

O BNG trasladou este venres o seu compromiso de ser "a primeira liña de...

O TSXG confirma a sentenza dun xulgado de Vigo que declaraba legal a prórroga do servizo municipal de auga

O Tribunal Superior de Xustiza de Galicia (TSXG) confirmou a sentenza ditada en 2022...