O presidente da Deputación de Pontevedra, Luís López, trasladou á presidenta da Federación Española de Municipios e Provincias, María José Pelayo, a axenda municipalista do goberno provincial nunha recepción institucional que tivo lugar este luns no Castelo de Soutomaior.

Na recepción institucional, na que participaron membros do goberno provincial, analizáronse asuntos como o reto demográfico ou o investimento municipal.

Durante a cita, e segundo explican nun comunicado, os dirixentes profundaron en cuestións como o financiamento ou as competencias das entidades locais, así como o papel que xogan os gobernos provinciais para asegurar os servizos básicos nos pequenos municipios fronte a retos como o demográfico ou a axenda urbana.

A este respecto, Luís López destacou o compromiso da Deputación de Pontevedra para asegurar nos concellos “servizos que melloren o benestar dos veciños, reducir a fenda dixital e apoiar o desenvolvemento económico dos negocios locais”.

Apuntan que, precisamente como parte dese compromiso, a Deputación puxo en marcha a +Provincia ou o Plan Provincia Comunitaria. O primeiro é o plan de obras e servizos “co orzamento máis alto da historia da Deputación”. “Un total de 48,2 millóns de euros que serán postos a disposición dos concellos da provincia e que, na repartición de fondos, ten en conta por primeira vez o reto demográfico”, destacan.

Así mesmo, o apoio a colectivos sociais, veciñais e culturais reflíctese no Plan Provincia Comunitaria, dotado cun millón de euros para dinamizar e apoiar o rico e variado tecido asociativo da provincia de Pontevedra; e o Plan extraordinario de infraestruturas deportivas, de catro millóns, que aspira a modernizar estas instalacións en todos os concellos.