O pleno da corporación municipal do Porriño aprobou unha moción para solicitar á Xunta de Galicia melloras na atención do centro de saúde da localidade, urxindo a cobertura do cadro de persoal actual e un incremento de prazas para servizos como o de fisioterapia, saúde mental ou enfermaría obstétrico-xinecolóxica. Tal como informa o BNG nun comunicado, no pleno de decembro aprobouse por unanimidade esta iniciativa, impulsada precisamente polos nacionalistas, na que se insta ao Executivo autonómico a dotar ao centro de saúde de suficientes servizos básicos diarios, así como a cubrir as ausencias médicas e a ampliar as prazas de pediatría e enfermaría, entre outras.

O BNG criticou que fai tres meses o PP local negase saturación das axendas no Porriño, “cando ata a propia Xunta recoñeceu no Plan Local de Saúde 2023-2026 que existían necesidades sanitarias non cubertas, con cotas por encima dos cocientes recomendados”. O partido lembrou que a poboación que ten asignada o centro de saúde do Porriño aumentou nos últimos anos tanto en maiores de 65 anos como en nenos, “pero iso non se reflicte no cadro de persoal do novo centro de saúde”. Por iso é polo que presentasen esta moción que foi aprobada no pleno, para así solicitar os recursos necesarios.