O comité de empresa de Vitrasa, concesionaria do bus urbano de Vigo, pediu este mércores a dimisión do alcalde, Abel Caballero, e do portavoz do goberno local, Carlos López Font, por actuar “da man” da empresa no conflito laboral que arrastran desde hai anos e por non ser capaces de “solucionar” a situación, cando se cumpren 25 días de folga indefinida.
Nunha rolda de prensa, o órgano de representación dos traballadores, formado por delegados de catro sindicatos, saíu ao paso das declaracións tanto do goberno vigués como da propia empresa, e replicaron que, realmente, “é o Concello o que está a politizar o conflito”, usando os mesmos argumentos que a propia Vitrasa (acusan a CIG e BNG de estar detrás das protestas para danar ao servizo e á cidade) e todo para “esquivar as súas obrigacións”.
Así o trasladou o presidente comité, Imanol Arnoso (CIG), que subliñou que “non é serio” que un goberno municipal faga esas formulacións. “Se non son capaces de solucionar isto, que o deixen, que se vaian”, incidiu e, na mesma liña, volveu a pedir á empresa que, se é certo que o servizo non é rendible e leva anos con perdas, “abandone” a concesión.
Arnoso subliñou que as negociacións para o novo convenio seguen bloqueadas, porque a concesionaria insiste en vincular calquera acordo ao reequilibrio económico por parte do Concello. Nese sentido, o comité denunciou que, aínda que aínda non se sabe cal será a compensación que pagará o Concello, “a empresa xa está a dicir que será insuficiente”.
Tras volver criticar que Vitrasa non fixo máis que “devaluar” o servizo público de transporte urbano de Vigo, negou as afirmacións da dirección da empresa sobre o apoio á folga. Segundo lembrou o presidente do comité, nunha votación na que participaron 244 traballadores (dos 350 aproximadamente que ten o persoal), 214 votaron a favor de manter as mobilizacións e, dentro diso, “gañou a folga indefinida”.
Finalmente, o comité volveuse a desmarcar dos actos vandálicos que se viñeron rexistrando nos últimos meses, con lanzamento de obxectos e danos en varios vehículos da frota de Vitrasa. Con respecto ao traballador ferido nas últimas horas, Imanol Arnoso matizou que foi trasladado a Urxencias “por precaución” pero que “xa está a traballar outra vez” e “non ten nada”.
NOVA PLATAFORMA
Por outra banda, Imanol Arnoso informou de que os sindicatos elaboraron unha nova plataforma coas súas demandas para a negociación do convenio, dado que a anterior data de 2020 e tivo que ser “actualizada”. Así, o comité pide que se actualicen os seus salarios, que levan tres anos conxelados, e lembrou que os traballadores, que “agora mesmo están a perder un 16,5 % de poder adquisitivo”, tamén necesitan “un reequilibrio económico”. A iso súmanse outras melloras nas condicións de traballo, como a regulación do descanso ou a adecuación das rutas e horarios “á realidade da cidade”.
TRABALLADORES “ABANDONADOS”
O vicepresidente do comité, Noli Núñez (CC.OO.), incidiu en que a folga indefinida é mesmo “rendible” para a empresa, que ten a metade de gastos, ao ter en activo menos buses e a metade do persoal parado, pero con todos os autocares cheos. “Nós somos os sufridores do conflito. Nós somos os que estamos todos os días ás 5.00 horas nas instalacións para controlar os buses que saen. Estamos a desexar chegar a un acordo, por nós e polas nosas familias, isto non é broma, é algo moi serio”, subliñou, e tachou de “vergoñoso” que, neste conflito, o goberno local “vaia da man” da empresa e deixe “abandonados” aos traballadores.
Na mesma liña, Rosa Pampillón (UGT) tamén subliñou que “é sorprendente que o alcalde mire para outro lado” cando a empresa concesionaria “basea a súa xestión nos incumprimentos”. Así, ademais dos numerosos requirimientos na Inspección de Traballo, puxo como exemplo o Plan de Igualdade de Vitrasa, que “está caducado” e, pese iso, o Concello prorrogou en 2020 por 5 anos máis a concesión.
