A conselleira de Economía referiuse este mércores, en resposta a unha pregunta oral durante o pleno do Parlamento de Galicia da deputada do PP Noelia Pérez, á situación vivida a comezos de novembro no aeroporto de Peinador de Vigo, onde decenas de pasaxeiros dun voo da compañía Air Nostrum quedaron en terra para que o avión fose cedido á expedición do Sevilla CF de fútbol.
Lorenzana sinalou que o Instituto Galego de Consumo prestou asesoramento aos afectados a través de chamadas telefónicas e a posta a disposición de información e documentos para exercer os seus dereitos ante unha “situación tan anómala” como a acontecida. Neste sentido, confirmou que Consumo requiriu información á aerolínea Air Nostrum e á operadora Iberia para que aclaren o acontecido e que podería derivar nun expediente sancionador, á vez que mantén vías de comunicación con Fiscalía, encargada de investigar posibles infraccións no ámbito penal.
