O reitor da Universidade de Vigo, Manuel Reigosa, destacou a “boa sintonía” na que se levou a cabo o seu primeiro encontro co novo presidente da Deputación de Pontevedra, Luís López. Tal como informaron ambas as institucións, este mércores celebrouse a primeira reunión de traballo entre ambos desde que López chegou á presidencia provincial. Este encontro tamén incluíu unha visita ás instalacións do Centro de Apoio Científico-Tecnolóxico á Investigación (Cacti) e do Centro de Investigación en Nanomateriais e Biomedicina (Cinbio).

Os dous subliñaron que o encontro era “moi necesario e positivo”, no cal se profundou nunha longa relación de colaboración que “axudará a facer de Pontevedra unha provincia moito máis competitiva, un lugar no que os mozos teñen un gran futuro”, segundo reivindicou López. “Son moitos os programas e convenios que había e que vai haber”, engadiu, ratificando a intención do goberno provincial de seguir colaborando coa Universidade de Vigo en ámbitos como o Medio Ambiente, o Deporte ou a Igualdade, entre outros.

Pola súa banda, Reigosa recalcou que a Universidade ten como obxectivo ser un axente “moi activo”, que traballa para favorecer o progreso das dúas provincias nas que está implantada. “A partir de agora porémonos a traballar para conseguir un futuro mellor para a provincia, algo no que a Universidade de Vigo non escatimará esforzos e no que estou seguro que contaremos con axuda da Deputación”, subliñou o reitor.

No encontro tamén estiveron presentes a vicepresidenta primeira da Deputación, Marta Fernández-Tapias, e os vicerreitores Eva Lantarón, do Campus de Pontevedra; Belén Rubio, de Investigación, Transferencia e Innovación, e Alfonso Lago, de Titulacións e Innovación Docente.