O Aeroporto de Vigo realizou este mércores un simulacro xeral de accidente aéreo co obxectivo de avaliar os procedementos de actuación establecidos no devandito plan, analizar a súa eficacia e comprobar o grao de coñecemento e integración dos diferentes colectivos implicados na atención dunha emerxencia aeroportuaria.
Tal como informou Aena nun comunicado, todos os seus aeroportos dispoñen dun Plan de Emerxencias Aeronáuticas, destinado a minimizar as consecuencias que poderían derivarse dun accidente. “O seu labor fundamental é garantir, por unha banda, a protección das vidas humanas e os bens que puidesen verse afectados por un incidente dese tipo e, por outro, a continuidade ou restablecemento da operatividade aeroportuaria”, subliñou a firma.
SIMULACRO
No simulacro de Peinador deste mércores analizáronse os tempos de reacción e resposta de todos os colectivos (internos e externos) implicados. Con este exercicio, o aeródromo vigués cumpre coa normativa da Organización de Aviación Civil Internacional en materia de planificación de emerxencias. En concreto, simulouse o accidente dunha aeronave na que viaxaban 36 pasaxeiros e catro tripulantes, que se sae da pista ao aterrar e acaba fóra do recinto, terminando incendiada. O balance é de 28 feridos e 12 falecidos.
Tras coñecer o suceso, o Centro de Control de Operacións acciona a alarma do Servizo de Extinción de Incendios (SEI) do Aeroporto e facilita aos bombeiros a localización e todos os datos que posúe do avión sinistrado. Á súa vez, dá aviso para que se activen os procedementos de emerxencia, chama ao 112 e executa o resto das accións previstas no Plan de Autoprotección.
Á súa chegada ao lugar, os bombeiros do aeroporto aseguran a zona e dispóñense a apagar o incendio declarado, tras o que se constitúe o Posto de Mando Avanzado. Durante estes primeiros minutos van accedendo ao lugar do accidente os medios de axuda exterior alertados polo 112. Bombeiros e servizos sanitarios atenden ás vítimas que se atopan nas proximidades da aeronave sinistrada e rescatan aos feridos. Traspásase o mando da emerxencia ao 112 e actívase o nivel 2 do Platerga.
Constituída a área de socorro e clasificados os feridos para determinar a orde de prioridade no seu tratamento e traslado, os efectivos sanitarios proceden á estabilización e evacuación destes. A delegada da Xunta en Vigo, Ana Ortiz, participou este mércores no simulacro, supervisando o traballo que se levou a cabo desde o centro de coordinación de Aena para o despregamento dos equipos de emerxencia e das forzas de seguridade.
