A Consellería de Infraestruturas e Mobilidade habilitará desde este luns un autobús de reforzo, á primeira hora da mañá, entre o municipio pontevedrés de Bueu e a Universidade de Vigo.

Desta forma, despois de identificar un aumento da demanda na liña Bueu-Cangas-Moaña-Meixoeiro-Cuvi-Álvaro Cunqueiro, derivado da apertura dun ano académico, a Xunta xa encargou á concesionaria a activación dun vehículo de reforzo, que opera desde o pasado xoves.

A este autobús, cunha capacidade de 64 prazas, sumarase outro servizo adicional desde este luns. Esta solución aplicarana na primeira expedición da liña, en días laborables, con saída ás 07,10 horas de Bueu, paso previo polo CUVI ás 08,30 horas e chegada ao Hospital Álvaro Cunqueiro ás 08,40 horas.

Co inicio do ano académico rexístrase un incremento da demanda de determinados servizos de transporte público interurbano. En consecuencia, para facer fronte ás necesidades dos usuarios o Executivo autonómico realiza un seguimento continúo do seu funcionamento co obxectivo de responder as necesidades de mobilidade dos cidadáns da forma máis eficiente.