O aeroporto de Peinador conta cunha alfombra de flores no hall de entrada, elaborada este fin de semana pola Asociación de Alfombristas para promocionar o Corpus Christi de Ponteareas.

O concello de Ponteareas informou a través dun comunicado que esta iniciativa está dirixida a “todos os pasaxeiros que pasen polo aeroporto vigués” para que poidan apreciar o que son as alfombras florais e todo o que significan para Ponteareas.

“Queremos que o público que aínda non coñeza Ponteareas e o Corpus descubra todo o que podemos ofrecer. E animamos a todo o mundo a compartir connosco nosa gran festa os días 10 e 11 de xuño”, sinalan os propios alfombristas.

Esta obra de arte efémera compleméntase coa promoción do documental ‘As mans do Corpus’, unha peza audiovisual que pon en valor o traballo colectivo, o esforzo e a singularidade das alfombras de Ponteareas e a súa gran festa.

O documental foi gravado durante a celebración do pasado ano 2022 para recoller todos os momentos da festa, así como os preparativos previos, menos coñecidos para turistas e visitantes. As persoas interesadas poden ver o documental na ligazón https://turismo.ponteareas.gal/corpus/ .