A Deputación de Pontevedra e a Universidade de Vigo (UVigo) abordaron este xoves a proposta de creación da futura Facultade de Enfermaría, coa que as Escolas de Enfermaría de Pontevedra, a do Meixoeiro (Vigo) e a de Ourense pasarán a formar parte completamente desta administración académica a partir do curso académico 2024/2025.

A proposta xa foi aprobada no claustro da Universidade e debaterase este venres no seu Consello de Goberno. A presidenta da Deputación de Pontevedra, Carmela Silva, e o reitor da Universidade de Vigo, Manuel Reigosa, mantiveron unha reunión de traballo para avanzar na integración das tres escolas de enfermaría.

Carmela Silva destacou que “isto é posible grazas á suma de vontades” da Universidade de Vigo, a Deputación de Pontevedra, a dirección, profesorado e alumnado da Escola de Enfermaría e a Xunta de Galicia e, especialmente á vontade de Manuel Reigosa. “Sen o reitor da Universidade de Vigo isto non sería posible”, asegurou.

Pola súa parte, Manuel Reigosa destacou que a institución quere que “o alumnado pase a ser 100% da Universidade e por tanto poida participar ao 100% na vida universitaria e non dunha maneira vicaria”, aínda que advertiu que o proceso de creación da Facultade “é longo”, pero todas as partes implicadas están “comprometidas” e “na Universidade levamos tempo traballando para a implantación do máster de enfermaría”.

O reitor da Universidade de Vigo tamén informou que están a traballar “na aspiración de ter un programa de doutoramento propio para que a facultade inclúa todos os títulos posibles de formación docente e investigadora de gran calidade“. Tamén, durante o período de adscrición directa, porán en marcha un programa de formación para que o persoal deste centro alcance o título de doutoramento e competencias en investigación.