O alcalde da Cañiza, o socialista Luís Piña, saíu este mércores ao paso das acusacións do PP, que presentou unha querela contra el (admitida a trámite) por suposta prevaricación administrativa ao negar presuntamente ao portavoz do grupo ‘popular’ o acceso a expedientes municipais. O rexedor rexeitou rotundamente que haxa resolución algunha para impedir o acceso á información e acusou ao concelleiro Miguel Domínguez de “mentir” e querer “montar un circo” en plena precampaña das eleccións locais.

En declaracións a Europa Press, o alcalde puntualizou que o propio xulgado confirma a apertura de dilixencias previas por indicios de prevaricación, pero que non se pode concretar aínda as circunstancias dos feitos nin as persoas que participaron neles. De feito, a única persoa citada polo momento, en calidade de testemuña, é o propio Miguel Domínguez, como querellante, que comparecerá o próximo 21 de xullo.

Ademais, Piña fixo público un certificado da secretaria municipal na que esta sinala que non consta que exista ningunha resolución da Alcaldía para denegar o acceso a expedientes “a ningún concelleiro”, unha acusación realizada polo PP.

Nese sentido, Luís Piña lembrou que a propia normativa establece o dereito dos concelleiros a acceder a esa información e que, se non reciben resposta no prazo de 5 días, dáse por autorizado o acceso. “Pero para iso hai que vir ao Concello a reclamar os expedientes, e Miguel Domínguez é un vago, que dedica o seu tempo como liberado na Deputación de Pontevedra a ir de bar en bar pola Cañiza intoxicando e mentindo”, proclamou.

O rexedor foi máis aló, e sinalou que a notaria coa que se presentou Miguel Domínguez no Concello para reclamar expedientes “interpretou mal” o que dixo a secretaria municipal. Así mesmo, lembrou que existe un decreto de decembro do ano pasado no que o alcalde acorda dar acceso a varios expedientes solicitados polo PP (en cumprimento dunha sentenza).