As obras de saneo e estabilización de noiros na autovía A-55 á altura de termo municipal de Tui obrigarán a desviar o tráfico en sentido Portugal por un único carril, segundo informaron fontes do Ministerio de Transportes, Mobilidade e Axenda Urbana (Mitma).

Os traballos desenvolveranse no quilómetro 28 da autovía e producirán afectacións ao tráfico desde este martes ás 8,00 horas ata o 30 de xuño de 2023.

Segundo explicou o Mitma, para levar a cabo estes traballos de conservación será necesario o corte total da calzada dereita en sentido Tui/Portugal, e desviarase o tráfico a través da calzada sentido Vigo, establecéndose un carril por sentido en configuración bidireccional entre os quilómetros 27 e 28 da A-55.

Os temporais da choiva do pasado inverno produciron un desprendemento nos noiros da calzada, que ocupou parte do carril dereito. Tras a retirada do material e a limpeza, así como o resto de actuacións preparatorias, este martes comezará a seguinte fase dos traballos.