O BNG de Gondomar instou á Xunta de Galicia a habilitar de forma gratuíta a AG-57 como alternativa durante as obras destinadas a reducir o risco de inundacións no devandito municipio pontevedrés.

Tal como indicou a organización nacionalista nun comunicado, estes traballos suporán a demolición da ponte da rúa Curros Enríquez, polo que desde o BNG lamentaron que nin o Goberno galego nin o local conten cun plan para canalizar o “intenso tráfico” que circula diariamente por esa vía.

“Nin a estrada Vincios-Couso nin o centro de Gondomar poden soportar tanto vehículo e os camións e autobuses simplemente quedarían atrancados”, indicou a concelleira Manuela Rodríguez, que alertou do “grave problema de seguridade” que se vai a producir durante o tempo de execución da obra, que se alongará durante preto dun ano.

Por iso, solicitou unha reunión urxente co Concello e coa Xunta para explorar alternativas que, ao seu xuízo, pasan por dar acceso “libre e gratuíto” á AG-57 para convertela nunha circunvalación de uso obrigatorio para todo o tráfico que non teña como destino Gondomar.