A Consellería de Infraestruturas e Mobilidade da Xunta confirmou este luns a posta en servizo, desde o 3 de abril, dunha nova liña de bus para mellorar as conexións entre a comarca do Morrazo e os hospitais de Vigo.
A nova liña directa incluirá dúas expedicións “que optimizarán a oferta de servizos entre Cangas e Vigo“, mellorando as conexións do Morrazo cos centros sanitarios da cidade olívica e atendendo as demandas trasladadas, “aínda que diverxentes”, dos concellos de Cangas e Moaña.
Os dous servizos funcionarán durante todo o ano, de luns a venres, ás 6,40 horas coa ruta estación de buses de Cangas-Hospital Meixoeiro-Hospital Álvaro Cunqueiro, e con volta ás 15,15 horas. Estes servizos complementan a actual oferta, que se mantén como ata agora os fins de semana. A ruta realizaranse sen paradas no centro urbano de Vigo, reducindo os tempos de viaxe para garantir a puntualidade do persoal que traballa neses hospitais.
