O Servizo Galego de Saúde (Sergas) convocará a través de concurso de méritos, sen oposición, oito prazas fixas consideradas de difícil cobertura en centros de Atención Primaria de municipios do sur da provincia de Pontevedra.
En concreto, incorporaranse tres médicos de familia aos ambulatorios de Covelo, Arbo e Ponteareas, respectivamente, mentres que haberá outro cinco pediatras: dous en Tui, un en Tomiño, un en Ponteareas e outro compartido para os centros de saúde de Covelo e Mondariz.
Así o avanzaron o delegado territorial da Xunta en Pontevedra, Luís López, e o xerente da área sanitaria de Vigo, Javier Ponte, quen visitaron este martes o centro de Covelo acompañados polo seu alcalde, Pablo Castelo.
López destacou que Galicia está “a actuar co máximo enxeño e esforzo, tanto normativo como económico, para ser a primeira comunidade que adopta e consegue solucións” ante a falta de médicos e de pediatras de Atención Primaria “que afecta a toda España”.
Así, o delegado da Xunta reivindicou que o Sergas o fai a través de “diversas medidas”, entre elas esta nova convocatoria por concurso de méritos con 413 prazas consideradas de difícil cobertura que se porá en marcha en próximos meses en Atención Primaria, Saúde Mental e hospitais comarcais. “Non imos parar ata fortalecer ao máximo a Atención Primaria para ser a primeira rexión de España que supera esta difícil situación”, subliñou Luís López.
