A portavoz nacional do BNG, Ana Pontón, enxalzou a figura do alcalde Xosé Emilio Barros, que aspira a revalidar coa formación frontista a Alcaldía obtida en 2019 no municipio pontevedrés de Mondariz, un concello “que necesita máis BNG”.

Na tarde deste sábado, a líder nacionalista participou no lanzamento da candidatura de Barros, de quen destacou o seu carácter “dialogante” nunha persoa “traballadora, con ideas e con valetía para levalas a cabo”.

“O próximo 28 de maio a veciñanza de Mondariz vai dar un apoio maioritario ao BNG para que Xosé Emilio lidere un goberno municipal con máis forza e con máis capacidade para seguir avanzando e mellorando, para que este concello siga a senda de progreso e de benestar que iniciou fai catro anos”, sinalou.

Segundo recolle un comunicado, Pontón reivindicou o camiño aberto con Barros fai catro anos, que abriu “un tempo novo de transformación e de modernización en Mondariz”, con “fitos” como o de “reverter” a perda de poboación no municipio.