O avance nas obras da vía de alta capacidade Tui-A Guarda entre as ligazóns da autovía A-55 e Areas fará necesario un corte de tráfico nocturno entre o xoves e o venres da próxima semana. En concreto, o corte realizarase no tramo comprendido entre os puntos quilométricos 29+100 e 30+600 da autovía A-55. Comezará ás 22,00 horas da noite do xoves 23 e finalizará ás 06,00 horas da mañá do venres 24.

Segundo detallou a Xunta, o obxectivo é a montaxe das vigas metálicas do paso superior en forma de glorieta sobre a autovía, para dar servizo aos ramais da mesma, ao tronco da vía de alta capacidade e á conexión coa N-551

Como itinerario alternativo, desde a saída 29, sentido Portugal, usarase a estrada PO-340, incorporándose á N-550 e despois á N-551, discorrendo polo termo municipal de Tui; sendo o mesmo percorrido en sentido O Porriño, pero á inversa. Este itinerario implica un tempo de percorrido de entre oito e dez minutos.