A presentación do proxecto transfronteirizo ‘Río Miño, un destino navegable’ foi unha das ponencias que tivo lugar este martes na xornada sobre “Dinamización territorial, patrimonio e turismo no tramo internacional transfronterizo: o caso do río Miño”. Así, o alcalde de Tui, Enrique Cabaleiro, desprazouse ata Punta Umbría en Huelva para dar a coñecer este proxecto, desenvolvido polo concello de Tui xunto ao de Salvaterra de Miño e as Cámaras Municipais de Valença e Monçao.
Esta actividade é un dos tres seminarios organizados no marco do Foro Internacional de Transferencia de Coñecemento en Economía Azul que se celebra en Huelva dentro do proxecto europeo Atlazul. A organización corresponde ao Centro Tecnolóxico do Mar-Fundación CETMAR, socio nesta acción financiada polo programa Interreg de Cooperación Transfronteiriza España-Portugal (POCTEP).
O alcalde, Enrique Cabaleiro, salientou que é “toda unha satisfacción vir presentar a un congreso internacional un proxecto que atañe directamente a Tui, á Eurocidade Tui-Valença, e tamén a Monçao – Salvaterra, convidados polo CETMAR”. O rexedor tudense valorou positivamente “a acollida que este proxecto tivo neste congreso, o que nos anima a seguir traballando nel”.
Ademais, avanzou que “cómpre estudar a súa ampliación cara unha segunda fase, na que haberá que reformular varias cuestións”. Engadiu que se trata dunha actuación encamiñada a poñer en valor o río Miño para convertelo nun “elemento de dinamización social, turística e polo tanto económica”.
O proxecto Río Miño Navegable ten coma obxectivo principal mellorar a navegabilidade do río Miño internacional mediante a xestión compartida do espazo Rede Natural 2000 do Baixo Miño e aproveitando a existencia de patrimonio natural e cultural de alto interese turístico asociado á especificidade do territorio coma vantaxe competitiva fronte a outros destinos.
