InicioVigo e contornaVigoA CIG responsabiliza ao Sergas pola "fuga" de sanitarios de Vigo

A CIG responsabiliza ao Sergas pola “fuga” de sanitarios de Vigo

Asegura que o Sergas non ampliará as prazas da área olívica, como apuntou.

PUBLICADO O

Nova denuncia da Confederación Intersindical Galega contra a xestión da Xunta de Galicia. A CIG vén de se manifestar publicamente tras o anuncio do Servizo Galego de Saúde (Sergas) sobre a oferta de 15 novas prazas de medicina de familia.

Acontece que, de acordo co sindicato, a amentada ampliación non incrementa o cadro de persoal da área de Vigo por tratarse de vacantes que que quedaron sen cubrir a causa de xubilacións e traslados a outros centros

En consecuencia, inciden, o anuncio da Xunta non supoñerá unha mellora da calidade asistencial polo menos no que respecta ao número de traballadores que hoxe exercen na demarcación olívica. Dende a central sindical denuncian tamén que a modalidade de contratación prevista para estas novas incorporacións supón unha diferencia con respecto ás actuais, xa que obriga á realización de dúas gardas en PAC en condicións similares ao coñecido como “contrato de continuidade”, que contou no seu día coa oposición do persoal médico. “Este novo contrato fixo abre a porta a un novo modelo de atención primaria, sen negociar e pola porta de atrás”, censuran.

De aí que, fronte esta precariedade, a CIG-Saúde defende a convocatoria dunha oferta de emprego que permita cubrir todas as prazas vacantes e que “supoña a mellora das condicións laborais como o paso necesario para reverter o deterioro da atención primaria”.

Ao mesmo tempo, amosan a súa preocupación polo número de residentes de medicina de familia e comunitaria que marchan da área na que se formaron. “Uns/has porque se decantan por traballar en urxencias e outros/as porque marchan a outras áreas ou a outros servizos de saúde por considerar a contratación nesta área menos atractiva”. Neste senso, consideran que as diferencias de baremo e ofertas dentro do propio Sergas favorece a fuga de profesionais de áreas sanitarias como a de Vigo, na que a sobrecarga de traballo é maior ca noutras nas que as condicións de traballo son mellores.

“É preocupante que este ano no MIR, malia ampliar o número de prazas nesta especialidade, houbo máis de 200 prazas que quedaron desertas, nove delas en Galiza. Esta situación ten que servir para reflexionar, pero é obvio que entre as causas están as condicións laborais na atención primaria, que non se solucionan reducindo o orzamento”.

Tamén amosan a súa sorpresa pola recente decisión de retirar o segundo equipo médico do PAC da Guarda, “nunha zona como o Baixo Miño, golpeada pola falta de profesionais e na que se viron moi aumentadas as necesidades, máis cando estamos en datas nas que o incremento do turismo xustifica máis ca nunca reforzar a zona para que non se repitan imaxes tan duras como as que se puideron ver o venres pasado no Rosal”.

Ante esta circunstancia, a CIG redobra a súa aposta pola “estabilización” daquelas prazas que non son fixas; é dicir, por rematar coa interinidade de certos profesionais achegándolles a praza, ben sexa mediante oposición ou concurso de méritos. Para a CIG, este cambio permitiría mellorar as condicións laborais, “nomeadamente nas zonas rurais nas que pola distancia ao centro de traballo, a dispersión da poboación e o envellecemento da poboación está resultando máis difícil cubrir as prazas”.

ÚLTIMAS

Gonzalo Caballero proposto polo PSOE de Vigo como candidato galego ás europeas

A asemblea do Partido Socialista de Vigo propuxo ao que fora secretario xeral do PSdeG, Gonzalo Caballero,...

Claudio Giráldez renova como adestrador do Celta ata xuño de 2025

O adestrador galego Claudio Giráldez renovou este xoves o seu contrato como técnico do RC...

Vigo supera de novo os 300.000 habitantes, “de longo a maior cidade de Galicia”

O alcalde de Vigo, Abel Caballero, anunciou que a cidade volveu a superar os 300.000 habitantes...

Case nove de cada dez usuarios da Asociación Érguete en Vigo comezou a consumir drogas antes dos 18 anos

Preto do 88% dos usuarios da Asociación Érguete en Vigo comezou a consumir drogas antes...