O pleno do Concello olívico aprobou, cos votos a favor do PSOE e da Marea de Vigo e en contra do PP, instar á Xunta a que convoque “de inmediato” aos sindicatos da Xustiza, que sente a negociar o vicepresidente da Xunta, Alfonso Rueda, e que se resolva a folga de forma satisfactoria, ou “de non facerse así”, solicitará a dimisión do tamén conselleiro de Xustiza.
Así foi acordado no pleno que se celebra este mércores, no que interviñeron os traballadores da Xustiza. Alí, no día en que cumpren 78 días en folga, insistiron en que non piden “un incremento salarial, senón a equiparación co resto de comunidades autónomas” e manifestaron que o que queren é “negociar xustamente”, e referendaron que “a loita segue”.
“Loitamos contra a intransixencia por parte do partido que nos Goberna”, remarcou, incidindo en que a folga se mantén desde o día 7, con aproximadamente un 70 por cento de seguimento, “porque quen ten que negociar non o fai”, concluíron.
A Marea de Vigo ratificou que no relativo aos traballadores da Xustiza “hai un agravio entre Galicia e o resto de comunidades”, e acusou ao Goberno galego de “usar a táctica das patronais retrógradas: Dividir e non dar lexitimidade aos representantes”. A pesar diso, destacou que estes traballadores son “un exemplo de unidade sindical” e animoulles a “non ceder á chantaxe da Xunta”.
Pola súa banda, o concelleiro socialista Carlos López Font apuntou que “debería facer arroibar a calquera representante político” a cantidade de días que os traballadores levan en folga. “É inxustificado que, 78 días despois, estea a pedirse que sente a negociar o vicepresidente da Xunta”, criticou, entre os aplausos do público.
Finalmente, pechou a rolda de intervencións o alcalde olívico, Abel Caballero, que transmitiu que nesta folga os traballadores “teñen o apoio do alcalde, do goberno, do pleno e desta cidade”, o que novamente foi acollido con aplausos e co grito por parte dos traballadores dun dos cantos que usan nas súas mobilizacións: “Contra a prepotencia, resistencia”.
DEREITO A PEDIR UNHA MELLORA
Finalmente, a portavoz do PP, Elena Muñoz, comentou que “todos os traballadores teñen dereito a pedir unha mellora nas súas condicións laborais”; após o que defendeu que “a vontade de negociar” da Xunta “sempre estivo encima da mesa” e a man “segue estando tendida, coa intención tamén de tratar por igual a todos os funcionarios públicos”.
Estas palabras foron acollidas entre murmurios dos traballadores da Xustiza presentes entre o público, que chegaron a gritar “mentira, mentira”, cando a portavoz manifestou que o que agora piden os traballadores é “unha suba de máis de 900 euros” e situarse “por enriba da media estatal”.
