A conselleira de Medio Ambiente, Territorio e Vivenda, Ángeles Vázquez, asegurou que Galicia é “compatible” coa minaría e a instalación de parques eólicos se se “cumpre” a normativa e se respecta o medioambiente, e demandou que o regulamento de costas sexa “participativo” e “transparente”.
Nunha entrevista concedida a RNE, recollida por Europa Press, a conselleira afirmou que “nunca hai barra libre para ningún proxecto”, xa que se debe realizar un “cumprimento estrito” das normativas, aínda que incidiu na importancia de “compaxinar” un medioambiente “saudable” cunha dinamización da economía, xa que “non se entendería Galicia totalmente despoblada”.
Ángeles Vázquez comparece nun pleno do PG, en imaxe de arquivo. XUNTA
Unha afirmación que colisiona frontalmente coas denuncias que diversas asociacións ecoloxistas, ambientais e veciñais levan realizando nos últimos meses a respecto da política de man aberta da Xunta de Galicia; que, de feito, recibiu un golpe do TSXG por ter aprobado un proxecto eólico de Norvento fragmentado de xeito “irregular”, de acordo co tribunal. O obxectivo desta fragmentación, explican dende o ecoloxismo, pasa por esquivar os requisitos do estudo de impacto ambiental; xa que, ao estudar por separado partes dun proxecto –que en realidade é un só– os efectos agardados sobre a natureza son menores.
Tamén apuntou que a instalación de parques eólicos encaixa coa comunidade dada a súa aposta por esta enerxía “respectuosa co medioambiente”, pero remarcou a importancia de reducir o impacto paisaxístico, para o que lembrou que se desenvolveron as directrices correspondentes. Un día despois de que se realizase unha marcha multitudinaria en Galicia e León contra un gran proxecto eólico previsto na zona limítrofe, a conselleira explicou que se estableceron zonas de interese paisaxístico nas que non se poden instalar.
“PROTEXER EN EXCESO AO LOBO”
Noutra orde de cousas, confiou en que se alcance un acordo “consensuado” respecto da situación do lobo, que remarcou que non se atopa en perigo de extinción. De feito, afirmou que en Galicia hai un número de exemplares similar ao de toda Francia ou Portugal e apostou por non “protexer excesivamente” á especie para evitar “desproteger ao gandeiro”.
En todo caso, recalcou que en Galicia non se caza o lobo, senón que “se fan esperas cando hai unha presión moi forte nunha zona sobre as gandarías”. Así, afirmou que “protexer en exceso o lobo” podería causar a perda de razas autóctonas de vacas ou outros animais. Tamén criticou que o equipo de traballo do Goberno sobre este animal “leve anos sen reunirse”.
