O Xulgado de Primeira Instancia e Instrución número tres de Ponteareas concluíu que existen indicios de criminalidade respecto de dúas persoas como presuntas autoras de incendios forestais orixinados en setembro de 2015 na zona de Salvaterra.

No auto, o xuíz Francisco Juan Hernández dá por finalizada a investigación que arrincou a partir da vaga de lumes rexistrada o 6 e 7 de setembro de 2015 na área de Salvaterra do Miño, após “unha ardua e complicada instrución”.

Nesta resolución, apunta á existencia de indicios de criminalidade con respecto a dúas persoas, ás que considera sospeitosas de cometer senllos delitos de incendios forestais, e empraza á Fiscalía a formular o escrito de conclusións solicitando apertura de xuízo oral ou o sobresemento da causa.