O Departamento de Investigación e Reconstrución de Accidentes (DIRAT) da Garda Civil reconstruirá este martes o accidente mortal da autoestrada AP-9 no que faleceron tres novos de 17 anos o pasado mes de maio.

O Departamento de Investigación e Reconstrución de Accidentes da Escola de Tráfico de Mérida estará este martes na provincia de Pontevedra para colaborar nas investigacións que realiza o Subsector de Tráfico.

O responsable do DIRAT, acompañado do capitán xefe do Subsector de Tráfico da Comandancia de Pontevedra, informará este martes sobre o desenvolvemento das probas técnicas que levan a cabo “para coñecer as posibles causas e as circunstancias nas que se produciu o accidente”.

O sinistro ocorreu pasadas as 21,00 horas do 29 de maio na AP-9 á altura da Raqueta de Torres de Padín, en dirección a Vigo, na parroquia viguesa de Teis, cando un turismo ocupado por cinco novos se saíu da vía e, tras chocar contra un alicerce dun viaduto e contra o gardarraíl, acabou envorcado.

Como consecuencia do impacto morreron tres ocupantes do coche, dúas mozas e un mozo, tres estudantes de 17 anos. A moza saíu despedida do vehículo, mentres que os outros dous falecidos tiveron que ser excarcerados polos bombeiros.

Por outra banda, o condutor do coche, M.M.V., de 18 anos de idade, foi trasladado en ambulancia medicalizada ao Hospital Álvaro Cunqueiro, e o copiloto foi evacuado ao centro hospitalario de Fátima.

Tres mortos nun accidente de tráfico na AP-9 ao seu paso pola parroquia viguesa de Teis