O conselleiro de Sanidade, Antonio Gómez Caamaño, considerou que os maiores manexan a aplicación móbil do Servizo Galego de Saúde (Sergas) “que te cagas” e puxo o foco na importancia da atención domiciliaria. Así o sinalou durante a súa intervención nun almorzo informativo organizado por Executive Forum España en Vigo, onde Caamaño apuntou cara ás voces que din que a xente maior non entende de tecnoloxía: “E unha merda”.
Segundo dixo, atendendo ao número de entradas á aplicación do Sergas, os maiores manéxana “que te cagas”, polo que defendeu que en moitas ocasións os cidadáns non terían que ir aos centros de saúde e poderían ser atendidos desde as súas casas. Respecto diso, reivindicou a necesidade de axustar o sistema sanitario ás necesidades da poboación. Sobre iso, dixo, por exemplo, que os mozos buscan “rapidez” e flexibilidade. Eles, segundo explicou, acoden “pouco” ao médico, polo que cando van esperan poder facelo rápido.
Precisamente, despois Caamaño visitou a nova unidade de hospitalización a domicilio, HADO, do hospital Álvaro Cunqueiro, que conta agora con sete equipos formados por un total de 15 profesionais: sete facultativos, sete enfermeiros e un supervisor. Tras un investimento de máis de 630.000 euros, ampliouse a superficie dispoñible ata os 300 metros cadrados. En 2024, atendéronse nas súas casas a 791 pacientes.
Caamaño trasladou o compromiso da Xunta coa hospitalización a domicilio para pacientes que, debido ás súas enfermidades, requiren ingreso pero prefiren permanecer no seu fogar, onde os profesionais proporcionan os mesmos coidados e atencións que no hospital. Así, avanzou que a idea é ampliar funcións desta unidade, para cubrir no domicilio un maior número de procesos, como os relacionados con pacientes con insuficiencia renal, por exemplo.
O PSdeG tacha de “broma de mal gusto” as declacións do conselleiro
A portavoz de Sanidade do PSdeG, Elena Espinosa, cualificou de “broma de mal gusto” as declaracións do conselleiro de Sanidade, Antonio Rodríguez Caamaño, sobre o uso da ‘app’ do Sergas por parte das persoas maiores ao considerar que “evidencian, unha vez máis, a falta dunha visión realista e comprometida cos verdadeiros problemas do sistema sanitario público galego”. Espinosa sostivo que “é preocupante que, en lugar de achegar solucións concretas”, o responsable da sanidade en Galicia recorra a frases coloquiais e expresións desacertadas para minimizar a gravidade da situación que atravesa o sistema de saúde de Galicia.
Para a deputada do PSdeG é unha “broma de mal gusto” que o conselleiro pretenda vender a idea de que a sanidade galega funciona de forma óptica, “obviando os graves problemas estruturais que afectan aos profesionais sanitarios e aos pacientes”. A realidade, dixo, “é que a falta de persoal, a deterioración da atención primaria e as listas de espera interminables seguen sendo o día a día de miles de galegos e galegas que dependen do Sergas”. Por iso, asegurou que “dicir que as listas de espera son relativas é unha falta de respecto a quen espera meses ou mesmo anos por unha consulta ou unha intervención”. Espinosa fixo referencia á aposta do conselleiro por unha “área sanitaria única”.
“Non explica como encaixa esta visión coa descoordinación actual entre hospitais, a falta de reforzos en atención primaria e o peche de servizos en varias localidades galegas”, indicou. “Falar de eliminar a graxa do sistema esconde unha política de recortes encuberta que prexudica a calidade asistencial”, considera a parlamentaria, que tacha de “inaceptable” que Caamaño “reste importancia á preocupación cidadá sobre o número de camas hospitalarias dispoñibles”. Así, sostén que “a hospitalización a domicilio e os hospitais de día poden ser solucións complementarias”, pero “non poden substituír a necesidade de contar con recursos suficientes nos centros hospitalarios”.
En canto ás novas tecnoloxías, Espisona coincidiu en que o acceso a ferramentas dixitais é “positivo”, pero “non pode ser unha escusa para esconder as carencias na atención presencial”. “A realidade é que moitas persoas seguen atopando dificultades para manexar aplicacións como a do Sergas e, en demasiadas ocasións, vense obrigadas a recorrer a terceiros para poder xestionar as súas citas so acceder á súa historia médico”, apuntou.
Por último, en materia de saúde mental, valorou o feito de que o conselleiro “admita que o sistema non está preparado para afrontar a epidemia” de problemas psicolóxicos e psiquiátricos”. Con todo, critica que non presente solucións concretas para abordar a falta de profesionais nin para mellorar o acceso á atención psicolóxica e psiquiátrica. “É urxente un reforzo dos recursos en saúde mental, cun compromiso claro de dotar ao sistema dos profesionais e medios necesarios”, apuntou. Por todo iso, esixiu ao conselleiro que deixe de minimizar os problemas estruturais do Sergas e adopte medidas urxentes para reforzar a sanidade pública en Galicia.
