Do 13 ao 22 de setembro, seis auditorios e salas de Vigo acollerán as propostas musicais do festival Underfest Xacobeo, que celebra a súa sétima edición co apoio da Xunta a través do patrocinio da marca Fest Galicia.

‘Richard Hawley’, ‘Ash’, ‘Gigolo Aunts’ e ‘El mató a un policía motorizado’ encabezan un cartel con concertos de 20 artistas, que se distribuirán por diferentes espazos da cidade dándolle ao público a oportunidade de gozar da música ao vivo en distancias curtas.

O Underfest engade este ano ao seu nome a mención ao Xacobeo e renova a súa adhesión a Fest Galicia, o selo impulsado pola Consellería de Cultura que ten como obxectivo promover o territorio galego como destino musical baixo criterios de calidade e sustentabilidade.

O director da Agadic, Jacobo Sutil, participou este xoves na presentación do evento na Galería Maraca de Vigo xunto a Raquel Seijo e David Lago, responsables de Sweet Nocturna, promotora do festival.

Na súa intervención, Jacobo Sutil subliñou que desde a Xunta se abordan os festivais de música ao vivo como “eventos estratéxicos” pola súa capacidade para darlles visibilidade e promoción ao talento musical galego, así como ao territorio, á vez que contribúen á dinamización e profesionalización do sector.