Un condutor de 44 anos de idade, J.A.N.V., resultou ferido grave este mércores tras saír da vía o vehículo que conducía no municipio de Soutomaior. Ademais, tivo que ser evacuado a un centro hospitalario en helicóptero medicalizado.

Segundo informou o CIAE 112-Galicia, o accidente produciuse na tarde do mércores, na rúa Alexandre Bóveda de Soutomaior e foron os profesionais do 061 os que alertaron a Emerxencias para informar de que mobilizaran o helicóptero medicalizado con base en Santiago.

O condutor implicado estaba inconsciente despois do accidente e ao lugar acudiron unha ambulancia de soporte vital avanzado, axentes da Garda Civil de Tráfico, de Policía Local e de Protección Civil. O ferido foi finalmente trasladado en helicóptero ao Hospital Clínico de Santiago de Compostela.