A Asociación Veciñal de Teis e a unión de xubilados e pensionistas de UGT Vigo, veñen de presentar un escrito para solicitar que se lle conceda a Antonio Collazo o recoñecemento de vigués distinguido a título póstumo.
Antonio Collazo Collazo, veciño de Teis, faleceu o pasado mes de agosto e fora directivo da Asociación Veciñal durante máis de dúas décadas, destacando o seu período como presidente.
“Foi un home entregado, que dedicou máis de 23 anos da súa vida de xeito desinteresado á asociación.”, explican desde o colectivo, que sinalan que se converteu nun dos referentes do movemento veciñal de Vigo pola súa longa traxectoria e implicación.
“Sempre foi unha persoa de ideas de esquerda e comprometido co seu pobo, que participou tamén no movemento sindical“, recordan. Así, foi membro da executiva da federación de químicas e enerxía de UGT Vigo e membro do comité da unión de xubilados e pensionistas. Os promotores da iniciativa poñen en valor tamén a súa faceta humana.
Xa o pasado 28 de xaneiro tivo lugar unha homenaxe no local social da asociación, na que quedou demostrado o recoñecemento que existe na cidade á figura de Antonio Collazo.
