InicioPolíticaA Xunta responsabiliza a Vigo dos problemas de auga que pode haber...

A Xunta responsabiliza a Vigo dos problemas de auga que pode haber a partir de novembro pola seca

Lamenta o "deixamento" do Concello en "a súa competencia" e a falta de plan de emerxencia municipal para a seca. En resposta, o goberno local censura o "cinismo" de Ethel Vázquez e repite que a Xunta "non fai nada" para garantir a auga.

PUBLICADO O

- Advertisement -

abastecemento de auga potable en Vigo pode estar comprometido a partir do mes de novembro, se non hai choivas moderadas e continuas antes, e se non se pon en marcha a nova estación potabilizadora, segundo alertou este luns a conselleira de Infraestruturas, Ethel Vázquez.

A conselleira sinalou que, se se mantén a seca actual, no mes de novembro o encoro de Eiras (que abastece á cidade e varios municipios da contorna) baixará do 40 % da súa capacidade, momento no que a actual estación potabilizadora terá problemas para tratar a auga almacenada, que nesas cotas xa ten máis material en suspensión e é máis rica en ferro.

Ethel Vázquez lamentou que pode repetirse un “escenario idéntico” ao de 2017, pero engadiu que, mesmo antes, en 2007, o propio rexedor admitía que a estación potabilizadora (ETAP) do Casal necesitaba ser reformada e reclamaba que a actuación fose declarada de interese xeral do Estado.

Desde entón, constatou, o goberno local demostrou “15 anos de deixamento” e só recentemente, no outono do ano pasado, puxo en marcha a reforma desa ETAP, unha obra “imprescindible” para garantir a auga e que permitiría aproveitar o potencial de Eiras, o encoro máis grande e con máis volume de auga almacenada neste momento (un 77,3 %) en toda a demarcación Galicia-Costa.

Respecto diso, engadiu que o propio estudo de alternativas de abastecemento cofinanciado pola Xunta, Goberno central e Concello conclúe que o principal problema é unha ETAP obsoleta, que non é eficaz cando a auga baixa do 40 % do volume da presa.

RECADACIÓN SEN INVESTIMENTO E SEN PLAN MUNICIPAL

Por outra banda, a conselleira recalcou que, tal e como recolle o artigo 25 da Lei de Bases de Réxime Local, o Concello ten a competencia sobre o abastecemento de auga, o que inclúe a ampliación da potabilizadora, para cuxas obras “non se solicitou a declaración de interese supramunicipal”.

Respecto diso, Ethel Vázquez lembrou que o Concello “cobra taxas” polo abastecemento tanto aos vigueses como aos municipios veciños aos que proporciona auga, e “recada 40 millóns de euros ano”. Por iso, con esa recadación, afeou ao goberno local que “non actuou en 15 anos” para resolver o problema da ETAP, na mesma liña que a delegada territorial, quen acusou ao goberno vigués de destinar esa recadación a “facer beirarrúas” en lugar de investir nesta infraestrutura básica.

RESPOSTA DO GOBERNO DE VIGO

O goberno municipal de Vigo saíu ao paso das declaracións da conselleira de Infraestruturas e tachou as palabras de Ethel Vázquez de “caradura e cinismo político enorme”, xa que a Xunta “escapa” da solución, eludindo intervir “no que é a súa responsabilidade”.

Así o trasladou o concelleiro de Fomento, Francisco Javier Pardo, a través de declaracións remitidas aos medios, nas que lembrou que o goberno municipal “leva máis de mil rúas humanizadas” coa correspondente renovación da rede de abastecemento e saneamento, con medidas para detectar fugas e intervir de forma inmediata.

Así mesmo, lembrou que a planta potabilizadora (ETAP) do Casal está a ser ampliada e modernizada, cun investimento de 23 millóns de euros “que paga en exclusiva o Concello”, sen achega da Xunta, a pesar de que é unha instalación supramunicipal, porque dá servizo tamén aos municipios de Cangas, Moaña, Redondela e unha parte de Mos.

“A competencia do abastecemento é municipal, pero a competencia na ordenación do mapa territorial da auga é da Xunta”, apostilou Pardo, quen acusou ao goberno galego “marear a perdiz, sen actuar nin facer nada”, nin en Vigo, nin noutros municipios, como Nigrán e Baiona. “Vigo asume competencias da Xunta pola súa incomparecencia”, engadiu.

Por outra banda, cuestionou “por que (a Xunta) non quere aplicar as conclusións do estudo” sobre abastecemento, un documento elaborado por unha “empresa externa” e que propón, entre outras medidas, un transvasamento para garantir a auga no sur da provincia.

Respecto diso, subliñou que “o problema non é o abastecemento, senón a captación da auga”, e criticou que a Xunta non fai “nin un só investimento”, como si os fai noutros municipios, porque “o que non consegue cos votos quere conseguilo coa desgraza: deixando Vigo os concellos aos que abastece sen auga”. “Seguen sen rebaixar o caudal ecolóxico. Seguen sen axudar a Vigo, ao contrario, queren crear un problema”, constatou.

Finalmente, con respecto ao plan municipal de emerxencia ante a seca, do que Vigo carece a pesar de estar obrigada por ter máis de 20.000 habitantes, o concelleiro socialista xustificou ese atraso porque ese documento ten que ser “coherente” co Plan da Seca da Xunta, e ese Plan, aínda que tiña que estar aprobado en xaneiro deste ano, foi aprobado en xuño e publicado no DOG en xullo pasado.

ÚLTIMAS

Caballero “tende a man” a Rueda e pide un encontro

O alcalde de Vigo, Abel Caballero, pediu un encontro co presidente da Xunta, Alfonso Rueda, para...

O Concello media coa compañía eléctrica para que reactive a luz á familia do Calvario con dous fillos menores

Os servizos sociais do Concello de Vigo mediaron coa compañía eléctrica para solicitar a reactivación da...

(Vídeo) A Confederación Hidrográfica investiga o vertido da cidade deportiva do Celta tras a denuncia de Ecoloxistas en Acción

Este martes, representantes de Ecoloxistas en Acción, xunto con membros das traídas de auga...

A atleta viguesa Susana Rodríguez, unha das nove “Barbie” que homenaxean a deportistas

'Mattel' anunciou este mércores o lanzamento de nove bonecas exclusivas 'Barbie' coas que renderá homenaxe a nove deportistas de...