A delegada territorial da Xunta en Vigo, Marta Fernández-Tapias, denunciou que o goberno municipal vetou a súa presenza na presentación do Torneo Internacional de Tenis Feminino, presentación que terá lugar na tarde dese xoves, nos xardíns do Pazo Quiñones de León en Castrelos.
Así, a Federación Galega de Tenis remitira unha invitación á Secretaría Xeral de Deportes da Xunta, que delegou a asistencia en Marta Fernández-Tapias.
Con todo, cando a representante do Goberno galego na cidade confirmou á Federación que sería ela a que asistiría, a entidade respondeu mediante un correo no que expón que “lamentablemente, desde o Concello de Vigo”, indícase que a invitación é “exclusiva” para o secretario xeral para o Deporte ou para algún conselleiro.
A Xunta denunciou a “falta de respecto institucional” por parte do goberno local e do alcalde Abel Caballero, ao “prohibir a asistencia” da representante do Executivo galego na cidade, e lamentou que “feitos similares se produzan de forma reiterada durante os actos públicos que se celebran a diario na cidade”.
