O PP anunciou este luns a presentación de iniciativas no Congreso, Senado, Parlamento galego, Concello de Vigo e Deputación de Pontevedra para instar o Goberno central a atender as demandas da cidade olívica no que respecta a grandes infraestruturas e dotacións.
Así o anunciou en rolda de prensa a presidenta da xestora local do partido, Corina Porro, quen subliñou que os ‘populares’ queren defender a cidade “sen demagoxias nin estridencias”, “reclamando o que a Vigo lle corresponde”. “É perigoso e grave que se sigan atrasando as grandes infraestruturas, ou que se tomen decisións que prexudiquen á economía e ás empresas”, engadiu.
A exalcaldesa e actual deputada autonómica preguntou “onde están as voces á fronte das reivindicacións” e “por que están calados os que sempre presumiron de ser os grandes defensores de Vigo”. “Por que son cómplices do deixamento e abandono de Vigo por parte do Goberno?“, cuestionou.
Respecto diso, insistiu en que é necesario “visibilizar” ese “abandono” e reclamar que se fagan realidade “algún dos anuncios” que se están facendo, porque a cidade padece “grandes carencias” que pon en risco o seu “progreso e desenvolvemento”.
INICIATIVA
Co fin de pór voz a esas demandas, o PP fixo pública unha iniciativa que recolle todas os grandes proxectos e investimentos que Vigo precisa, e que será presentada por concelleiras, deputados e senadores ‘populares’ nas diferentes cámaras.
Porro compareceu ante os medios xunto ao deputado no Congreso, Diego Gago; os senadores Elena Muñoz e Javier Guerra; a deputada autonómica, Teresa Egerique; e o portavoz municipal, Alfonso Marnotes; que explicaron cales son as principais reclamacións ao Goberno de Pedro Sánchez.
Así, os representantes do PP puxeron o acento no AVE a Madrid directo por Cerdedo e no impulso ao Corredor Atlántico, así como no saída sur, necesaria para apontoar a competitividade do Porto e para continuar o trazado de alta velocidade ata Portugal.
Tamén reclamaron que se invista na conversión da AP-9 en tramo urbano ao seu paso por Teis (desde Torres de Padín) e que se execute o compromiso de bonificar as peaxes e eliminar a taxa entre Vigo e Redondela, que se conecte a autoestrada co Ifevi, así como outras medidas para beneficiar á economía, como a redución do imposto de matriculación ou do IVE de determinados produtos e servizos.
No ámbito da automoción, o PP lamentou que este sector “non está na axenda do Goberno”, e esixiu que se retome a conexión do polígono de Balaídos á rede de moi alta tensión, que se revise un Plan Renove “que foi un fracaso”, ou que se aclare por que o Executivo pronunciouse en favor dunha planta de baterías en Cataluña cando aínda non se coñecen os criterios de repartición dos fondos europeos de recuperación.