O alcalde de Vigo, Abel Caballero, urxiu este luns a “acelerar” as obras da chamada Cidade da Xustiza, as novas dotacións xudiciais que a Xunta constrúe no edificio do antigo Hospital Xeral-Cíes, e criticou que levan “case dous anos de atraso”.
Nunha rolda de prensa, o rexedor olívico sinalou que, aínda que o proxecto é do seu agrado –pese ao inconveniente “de que non fagan aparcadoiro”–, “acumula un atraso tras outro”.
Así, segundo sinalou, a Xunta anunciou varios prazos de finalización das obras, empezando polo anunciado en 2016, cando se dixo que os novos xulgados estarían en marcha en 2019. Tras sucesivos atrasos, aseverou, o pasado outubro o goberno galego dixo que a obra acabará no primeiro trimestre de 2021.
“E non vai estar. Son case dous anos de atraso”, constatou o alcalde, quen proclamou que “convén acelerar as obras” e lamentou que eses atrasos se deben a que a Xxunta quere “aforrar diñeiro”.
ILUMINACIÓN DA GUÍA
Doutra banda, o rexedor referiuse ao informe negativo de Patrimonio da Xunta sobre o proxecto do Concello para iluminar o paseo e o exterior da capela do monte da Guía, que conta cun investimento de 400.000 euros.
Abel Caballero defendeu o proxecto e sinalou que o informe de Patrimonio é “subxectivo”, do mesmo xeito que ocorreu co rexeitamento da Xunta á instalación de ramplas en Gran Vía (que foi avalada polo Tribunal Superior de Xustiza de Galicia).
“Outra vez recibiron indicacións políticas”, constatou o alcalde, e engadiu: “Feijóo está a converterse nun gravísimo problema na cidade. Páranos todo o que pode”.
