O grupo de goberno aprobou en solitario o plan normativo de Vigo para 2021, que inclúe a ordenanza reguladora de comercio e a súa adecuación e a de terrazas en vía pública. Nun pleno celebrado este mércores, o portavoz do grupo municipal socialista, Carlos López Font, defendeu o plan, en cuxa votación se abstiveron os concelleiros de Marea de Vigo e o PP, mentres o edil do BNG votou en contra.

Deste xeito, derrogouse a normativa de venda en rúas e espazos abertos e previuse para 2021 a aprobación da ordenanza de vehículos de mobilidade persoal no marco do plan aprobado. Ademais, o próximo ano abordarase a actualización do regulamento da Policía Local, que contempla a estrutura e a organización do persoal.

Durante a sesión tamén se deu conta do informe definitivo de control financeiro das subvencións e axudas públicas concedidas polo Concello e a Xerencia Municipal de Urbanismo.

MOCIÓNS

Por outra banda, o pleno aprobou unha moción defendida por Carlos López Font para que o Goberno galego “adopte de inmediato un plan de indemnización para o sector da hostalaría de Vigo” que fixe as compensacións de acordo coas medidas articuladas en relación á situación sanitaria e que permita a súa execución inmediata.

Tamén se deu luz verde a unha moción do grupo municipal socialista para reclamar que o Executivo autonómico realice unha achega de recursos económicos en relación á poboación da cidade e que alcance polo menos o 10% do fondo de reconstrución consignado polo Goberno central.

Adicionalmente, o pleno volveu a demandar que o Goberno galego decrete a gratuidade do parking do Hospital Álvaro Cunqueiro e ceda unha parcela ao Concello para a construción dun novo aparcadoiro.

Así mesmo, a corporación municipal instou á Xunta a incrementar a dotación do Museo de Arte Contemporánea (Marco) ata os 500.000 euros anuais e a acometer unha reforma do Conservatorio Superior de Música.