O PSdeG-PSOE presentará unha proposición non de lei para o seu debate no pleno do Parlamento galego na que reclamará rescatar a concesión do hospital Álvaro Cunqueiro, para que sexa de titularidade “plenamente pública”, aproveitando as “condicións” do mercado financeiro e o contexto duns orzamentos expansivos.

Así o trasladaron o secretario xeral do partido, Gonzalo Caballero, e o portavoz de Sanidade do grupo parlamentario socialista, Julioo Torrado, en declaracións aos medios, realizadas á entrada de hospital vigués. Segundo sinalou Gonzalo Caballero, coa operación de venda de accións por parte da sociedade concesionaria, que supuxo que a propiedade maioritaria pasase a un fondo de investimento francés, quedou de manifesto “a gran farsa” de Feijóo sobre o hospital Álvaro Cunqueiro.

Así, lembrou que a Xunta pagará por esta infraestrutura o dobre do inicialmente previsto, a pesar de que se recortaron camas e servizos, cunha fórmula de canon anual (uns 73 millóns ao ano) que se revelou “pouco eficiente e extremadamente gravosa para as arcas públicas”.

Por iso, incidiu en que é “necesario reverter o hospital para o ámbito público”, o que permitirá reducir custos, xa que “é máis caro pagar un aluguer ao ano” que rescatar a concesión coas condicións de mercado que existen actualmente.

VARIAS ALTERNATIVAS

Nesa liña, o deputado e portavoz de Sanidade, Julio Torrado, que cualificou a situación do hospital vigués como unha “anomalía do sistema”, lembrou que, segundo os cálculos orzamentarios plurianuais, “quedan por pagar uns 550 millóns” á concesionaria do Álvaro Cunqueiro.

Segundo apuntou, a Xunta ten a posibilidade de acudir ao mercado financeiro para solicitar un crédito e recuperar a concesión, con condicións máis vantaxosas e con menos intereses dos que está a pagar agora (segundo as condicións que se acordaron coa sociedade que construíu a infraestrutura), e á vista de que a empresa estivo “disposta a vender”, como se comprobou coa operación de Acciona.

Outra vía sería “negociar coa empresa” outro modelo de rescate, “que empezou por darlle a titularidade á administración pública” e pactando os pagos. “Son grandes cantidades, pero a sanidade pública e o hospital máis grande de Galicia ben se merecen esta atención”, recalcou, e subliñou que o prezo ao que se vendeu parte da propiedade a ese fondo francés “é moito menor” que o que queda por pagar se se mantén o modelo actual.

Torrado incidiu na necesidade de que o Álvaro Cunqueiro sexa un hospital plenamente público, na súa titularidade e xestión, “e que non haxa que pedirlle permiso a unha empresa para ampliar camas, comprar material ou contratar persoal”. “É unha operación grande, pero posible. Só necesitamos que o PP decida se quere unha sanidade plenamente pública ou de cotitularidad privada en Vigo”, repetiu.