O grupo municipal Marea de Vigo reclamou este mércores que os fondos que obteña o Concello da liberación de superávit sexan investidos en mobilidade sustentable e conservación da biodiversidade, “máis aló de humanizacións e da axenda política de Abel Caballero”.

Así o trasladou o portavoz do grupo, Rubén Pérez, quen lembrou que, no acordo asinado inicialmente entre o Goberno de España e a Federación Española de Municipios e Provincias (FEMP), que preside o rexedor olívico, xa se contemplaba a priorización da mobilidade sustentable, a axenda urbana e a protección do medio ambiente.

Por iso, Marea de Vigo defendeu que se fagan investimentos neses ámbitos, porque é “perfectamente posible encaixalas no orzamento municipal”, e reclamou, así mesmo, que se volva a pór sobre a mesa o debate da área metropolitana e a aposta por mancomunar servizos para actuacións, por exemplo, as desinfeccións.

Con respecto aos investimentos, este grupo municipal propuxo que se poñan en marcha dous plans, segundo explicou a concelleira Oriana Méndez. Así, solicitaron a aprobación dun plan para a redución de emisións contaminantes, que inclúa a ampliación e mellora do transporte público, que se avance cara á municipalización de servizos concesionados, construción de aparcadoiros disuasorios, peonalizacións “planificadas e permanentes”, carrís-bici “seguros” ou a peonalización de Porta do Sol “sen túnel”.

Marea tamén reclamou que se poña en marcha un plan de conservación da biodiversidade, cun aumento de espazos verdes peonís, un plan de protección do patrimonio natural e histórico do Castro, un corredor verde ampliado na Senda do Lagares, medidas para rexenerar o litoral, actualización do protocolo para episodios de mala calidade do aire, ou o cumprimento da Declaración de Emerxencia Climática aprobada no Pleno.