InicioPolíticaGonzalo Caballero: "A vitoria do PSdeG en Vigo será a vitoria progresista...

Gonzalo Caballero: “A vitoria do PSdeG en Vigo será a vitoria progresista para unha nova etapa en Galicia”

Apela á confianza dos vigueses e promete traballar "á beira do alcalde"

PUBLICADO O

O secretario xeral do PSdeG-PSOE e candidato á presidencia da Xunta de Galicia, Gonzalo Caballero, reafirmou este mércores o seu compromiso coa educación pública e anunciou que aproveitará o fondo de 2.000 millóns anunciado polo Goberno de España para educación para implantar un plan de dixitalización, fortalecer o sistema de bolsas e a estrutura docente, todo iso adaptado ao escenario postcovid.

Así o trasladou, en declaracións aos medios, no acto de presentación da candidatura socialista pola provincia de Pontevedra, que el encabeza, que tivo lugar fronte ao museo MARCO de Vigo e que contou coa presenza do alcalde da cidade, Abel Caballero, e da presidenta da Deputación de Pontevedra, Carmela Silva.

Gonzalo e Abel Caballero nun momento da presentacion da candidatura PSde G. © Miguel NuñezGonzalo Caballero reiterou que a educación pública “vai ser bandeira do próximo goberno autonómico” se logra a vitoria electoral o 12 de xullo e, tras criticar que Feijóo é “o único presidente autonómico ao que non lle gusta que haxa fondos para a educación”, afirmou que os socialistas galegos apoian a dotación de 2.000 millóns anunciada polo Goberno central.

A ese respecto, apuntou que eses fondos servirán para que todos os estudantes galegos dispoñan de computador e conexión a internet, dentro dun plan de dixitalización para adaptar a educación ao escenario postcovid. Así mesmo, prometeu “máis docentes e máis bolsas”, libros de texto gratuítos, así como “maior dotación para os comedores escolares”.

“PASAR PÁXINA”  AOS 11 ANOS DE FEIJÓO

O candidato socialista fixo un chamamento aos galegos para que voten ao PSdeG o próximo 12 de xullo porque está “en xogo” o futuro de Galicia e unha reconstrución económica e social “na que ninguén quede atrás”. “Querémolo facer cunha formulación que incorpore a todos e permita pasar páxina a 11 anos de retroceso nos servizos públicos, destrución de emprego, privatización da sanidade e da atención aos maiores”, proclamou.

“Quero pedir a todos os galegos que se involucren (…), hai unha maioría progresista en Galicia, non nos podemos arrepentir doutros 4 anos máis de goberno do PP, da dereita de Feijóo”, pediu Caballero, e apelou tamén á confianza dos vigueses.

A ese respecto, advertiu de que “a vitoria (do PSdeG) en Vigo será a vitoria progresista para unha nova etapa en Galicia” e prometeu, se chega a ser presidente da Xunta, “traballar á beira do alcalde”, o seu tío Abel Caballero, para acabar co “rexeitamento” e a “tensión permanente” que recibe a cidade olívica por parte de Feijóo.

ÚLTIMAS

O BNG pide grupos e artistas locais en Castrelos, tamén como teloneiros, no canto do “autobombo” do alcalde

O grupo municipal do BNG en Vigo volveu a pedir un ano máis que o Concello...

Detido por exhibicionismo un home que se facía tocamentos e se masturbaba na praia viguesa de Samil

Axentes da Policía Local de Vigo detiveron a un home de 42 anos de idade, A.D.,...

Deteñen en Vigo a un mozo de 18 anos por unha suposta agresión sexual e intervéñenlle unha pistola simulada

Axentes da Policía Local de Vigo detiveron este domingo a un mozo de 18 anos...

PSOE e BNG de Vigo censuran a ausencia de conselleiros vigueses no novo goberno autonómico

As agrupacións locais de PSOE e BNG en Vigo criticaron este luns a ausencia...