O alcalde de Vigo, Abel Caballero, anunciou este martes que o goberno municipal reclama á Xunta de Galicia 1,7 millóns de euros de gastos en axudas sociais asumidos pola administración local, e advertiu de que, se o Goberno galego non paga, acudirá aos tribunais.

Así o confirmou o rexedor, que explicou que o Concello de Vigo outorgou axudas sociais, durante o estado de alarma decretado pola pandemia de coronavirus, por valor de 1,7 millóns, e que a Xunta de Galicia, a pesar de recibir ” do Goberno” fondos para estas continxencias, “a Vigo non chegou nin un céntimo”.

Por iso, o departamento de Benestar Social dirixirá unha carta ao Goberno galego para reclamar ese diñeiro, e esixirá que se pague “de inmediato, antes das eleccións” autonómicas de xullo. “Se non pagan, levareinos aos tribunais”, advertiu Abel Caballero.

O alcalde subliñou que outras comunidades autonómas fixeron efectivas transferencias aos municipios para facer fronte a eses gastos sociais, pero “a Xunta a Vigo deulle cero euros”. “É un escándalo, a Xunta marxinando a cidade”, incidiu.

Así mesmo, Abel Caballero asegurou que o Goberno galego debe a Vigo “inxentes cantidades” de diñeiro polas bolsas de comedor que outorga o Concello e que, segundo o rexedor, son competencia da administración autonómica.