O deputado do BNG no Congreso, Néstor Rego, trasladou este venres aos veciños de Teis e Chapela o seu compromiso de traballar “para que se cumpran” os acordos de investidura relativos á AP-9 e, entre eles, a supresión da peaxe de Redondela a Vigo.
Segundo explicou o deputado nacionalista, tras manter un encontro de traballo con representantes veciñais destas parroquias, así como con veciños de Trasmañó, a presenza do BNG de novo na Cámara Baixa serviu para poder, no acordo de investidura co PSOE, “facer fincapé” na situación da AP-9.
Rego sinalou a importancia de “invertir a tendencia dos últimos 40 anos”, dun viario con constantes subidas na peaxe, que son “unha carga” para as persoas e “un lastre” para o desenvolvemento económico de Galicia, co agravante de que a autoestrada ten a concesión prorrogada.
“Non imos permitir que o noso país continúe agraviado e discriminado”, proclamou o deputado do BNG e, nese contexto, informou os representantes veciñais dos acordos alcanzados nese pacto de investidura: eliminación da peaxe de Redondela, bonificación do cento por cento para usuarios recorrentes, e que o Estado asuma, vía Presupostos Xerais, o impacto das subidas de peaxe vinculadas aos convenios asinados en 2011 (por un goberno do PSOE) e 2013 (por unn goberno do PP).
Néstor Rego afirmou que o BNG “vai continuar traballando para que se cumpran” os acordos, así como para conseguir a gratuidade total da autoestrada e a transferencia a Galicia.
“ESPERAMOS CONCRECIÓN, NON MÁIS ESCUSAS NIN DEMORAS”
Pola súa banda, o portavoz da Asociación de Veciños de Teis, Anxo Iglesias, valorou o acordo alcanzado polo BNG, pero apuntou que “agora o importante é que se cumpra”, e lembrou que tanto esta entidade como a Asociación de Veciños de Chapela xa solicitou unha reunión co ministro Ábalos para “que concrete o prazo de supresión” da peaxe de Redondela.
“É unha reivindicación unánime, esperamos concreción, non hai máis escusas nin demoras, o que ten que haber é vontade política”, recalcou, á vez que advertiu de que os veciños de Teis e os de Chapela “non van abandonar as reivindicacións e mobilizacións” ata lograr ese obxectivo.
Mentres, o representante dos veciños de Chapela, Marcial Pérez, engadiu que, ademais da supresión da peaxe, e da conversión da autoestrada en viaria urbano desde as Torres de Padín, esta parroquia redondelana segue esixindo que se cumpran as melloras recollidas na addenda do convenio de ampliación a autoestrada (medidas contra a contaminación acústica e outras melloras).
Finalmente, Marcial Pérez reclamou “a todos os parlamentarios galegos, sexan do partido que sexan” que “presionen” para que os acordos sobre a AP-9 “queden plasmados nos Orzamentos Xerais do Estado para 2020”. “Non vale só con dicir que están de acordo connosco no Parlamento galego, nos concellos, etc. Á hora de mollarse, que voten pola xente que os votou“, proclamou.
