O alcalde de Vigo, Abel Caballero, arremeteu este mércores contra Marea de Vigo-Son en Común e contra o BNG, aos que acusa de oporse “ao avance da cidade”, “obedecendo instrucións políticas dos seus xefes en Santiago”. Así o manifestou o rexedor olívico nunha rolda de prensa, na que criticou duramente a posición destas dúas formacións políticas en diversas cuestións.
Por unha banda, asegurou que as ‘mareas‘ “estivo en contra” da ampliación da planta de PSA Peugeot Citroën, dos desenvolvementos terciarios de Cruceiro e Recaré (onde se construirán zonas comerciais), do Auditorio Mar de Vigo, da Ave por Cerdedo, do proxecto Vigo Vertical, das ramplas eléctricas de Gran Vía, da reforma de Porta do Sol e do transvasamento do río Verdugo, “e votaron sempre en contra dos orzamentos”.
En canto ao BNG, denunciou que se opón “ás bolsas de inglés, á humanización de Porta do Sol, e non queren axudas ao aeroporto” de Peinador. Segundo o alcalde, o seu “posicionamento continuo en contra de Vigo” débese a que están “a obedecer instrucións políticas dos seus xefes en Santiago”, e puxo como último exemplo desa actuación o ocorrido no pleno deste martes, no que o BNG se abstivo e Marea votou en contra da modificación puntual da PXOM para impulsar a transformación do Barrio do Cura. “e despois virán pedir o voto”, ironizou Caballero.
