O secretario xeral do PSdeG, Gonzalo Caballero, destacou que o alcalde de Vigo, Abel Caballero, conta co apoio do Partido Socialista de Galicia para volver presidir a Federación Española de Municipios e Provincias (FEMP).
Gonzalo Caballero pronunciouse deste xeito ao ser preguntado polos xornalistas sobre a disposición mostrada polo rexedor olívico para repetir no cargo de cara á próxima asemblea da FEMP que terá lugar este mes de setembro.
Na súa intervención, o xefe de filas do PSdeG lembrou que os socialistas galegos obtiveron “uns resultados históricos” nas pasadas eleccións municipais, tras as que gobernan en “tres das catro deputacións” e en “cinco das sete cidades galegas”. Ademais, incidiu en que Abel Caballero revalidou a súa maioría cun resultado “aínda máis notorio”.
“En Vigo alcanzamos un magnífico resultado, o alcalde de Vigo é un alcalde de referencia, que fixo unha magnífica tarefa á fronte da FEMP e que conta co apoio do PSdeG se a dirección federal o considera como candidato á reelección na FEMP”, destacou nunha intervención na que asegurou que o PSdeG está “totalmente aliñado” coa dirección federal.
