O vicepresidente da Xunta, Alfonso Rueda, replicou ao alcalde de Vigo, Abel Caballero, que o Goberno galego ten “a man tendida” para negociar co Consistorio vigués, pero que estas conversacións non poden estar condicionadas a “esixencias e ultimátums“. “Negociación toda, esixencias e ultimátums, ningún”, resumiu.

Desta forma respondeu Rueda a preguntas dos xornalistas sobre a carta que enviou Caballero á Xunta, na que indica que o diálogo está condicionado a que haxa mostras de “vontade” por parte do Executivo autonómico de saldar a “débeda histórica” coa cidade e “levantar vetos” sobre diversas actuacións.

Respecto diso, o vicepresidente galego lamentou que “pouco lle durou a boa vontade de negociar” ao rexedor olívico. “Mal empeza quen empeza condicionando unha negociación”, subliñou.

A xuízo de Alfonso Rueda, “non ten sentido” e, aínda que “haberá tempo de analizar a listaxe” que remitiu o alcalde, sinalou exemplos cos que non está de acordo, como a retirada da candidatura de Cíes ou do recurso á lei da área metropolitana. Por iso, concluíu cun chamamento a “falar”, tras insistir en que non ve “ningún sentido” na carta enviada “24 horas despois” de indicar que había vontade de diálogo. “Non o demostra”, resolveu.