O presidente da Xunta, Alberto Núñez Feijóo, volveu a aproveitar o Consello da Xunta para mandarlle un recado ao alcalde vigués. “Levamos feito moitas cousas e investimentos en Vigo con todos os atrancos impostos polo concello. Se non houbera atrancos pois fariamos eses investimentos máis rápidos e sería todo máis fácil”, dixo este xoves na rolda de prensa posterior á xuntanza do seu goberno.

Así, e preguntado polas declaracións de Abel Caballero que se mostrou disposto a falar con Feijóo, o presidente galego dixo que espera que esas declaracións “teñan efectos constatables”. “Gobernamos sempre a favor dos vigueses e sería máis fácil facelo co primeiro vigués, que é o seu alcalde”, destacou.

Por iso, Feijóo mostrou o seu desexo de que a oferta de Caballero “sexa posible”. “Comprobo en todas as entrevistas que estou tendo que é moi fácil dialogar cos alcaldes, tanto nacionalistas como socialistas… E se podemos falar con todos menos con un pois debería pensar se o diálogo é bo para Vigo. Nós si o pensamos”, indicou.