Os socialistas de Ponteareas instan ao Goberno de Mariano Rajoy e ao PP a que cumpran cos acordos acadados en materia de seguridade na N-120 co Concello de Ponteareas, iniciando as obras correspondentes, e a retirar o radar.
Dende o PSdeG de Ponteareas denuncian esta instalación de novos radares de velocidade na N-120 con fins, aseguran, unicamente recadatorios por parte do goberno de Mariano Rajoy. Estes radares, explica a edil socialista Vanesa Fernández, “non teñen ningunha lóxica xa que están colocados nunha recta con visibilidade onde a velocidade máxima é de 80 quilómetros por hora con liña descontinua, polo que está permitido adiantar”.
Ademais, a edil, despois de ter mantido diversas reunión cos corpos de seguridade, asegura que nunca se puxo de manifesto unha velocidade excesiva nese tramo, de feito, “os últimos datos das medicións levadas a cabo indican todo o contrario” engade Fernández.
Neste senso, os socialistas de Ponteareas instan ao Goberno de España a eliminar este radar e a tomar as medidas acordadas co Concello de Ponteareas e coa Plataforma de Afectados pola N-120 para e mellora da seguridade na denominada “carretera general”.
O Partido Socialista lémbralle ao Partido Popular e ao Goberno de España que os últimos accidentes do 2016 na N-120 marcaron un punto de inflexión para os veciños de Ponteareas que conviven día a día cunha autoestrada pola que pasan máis de 16.000 vehículos diarios.
Hai un ano o PSOE levaba unha PNL ao Congreso do Deputados aprobada co voto a favor de todos os grupos parlamentarios agás o do Partido Popular, na que se instaba ao goberno a mellorar a seguridade na N-120. Entre as propostas para a reforma e a mellora da seguridade da estrada ao seu paso polo termo municipal de Ponteareas, establecéronse obras como a instalación de catro rotondas, semáforos, pasos de peóns, pasos elevados e melloras de iluminación, “obras que son exclusivamente competencia do Goberno do Estado” sentencia Vanesa Fernández.
