O alcalde de Vigo, Abel Caballero, garantiu que se habilitará unha partida orzamentaria para afrontar o investimento correspondente ao convenio que permitirá realizar un estudo sobre o abastecemento de auga da cidade e a súa área metropolitana. Así, concretou que o gasto, uns 66.600 euros, dividirase entre os anos 2019 e 2020.

Caballero afirmou que o convenio recolle que a tramitación correspondente á habilitación do orzamento municipal destinado a este acordo realizarase de “forma complementaria” ao mesmo.

En concreto, o investimento total ascende a 200.000 euros, que serán sufragados a partes iguais polo tres administracións implicadas, o Concello da cidade olívica, o Ministerio para a Transición Ecolóxica e a Xunta de Galicia.

Caballero pronunciouse así en resposta á conselleira de Infraestruturas e Mobilidade, Ethel Vázquez, e á portavoz do PP de Vigo, Elena Muñoz, que acusaron o goberno local de non incluír este gasto nos orzamentos municipais de 2019. Así, Muñoz volveu recalcar que esta modificación das contas municipais deberá ser aprobada en pleno e que iso levará un atraso do convenio.

Pola súa banda, o rexedor vigués insistiu en que as alteracións introducidas pola Xunta no documento supoñen que se teña que reiniciar o proceso administrativo e advertiu de que iso derivará nunha dilación de varios “meses”.

Mentres, Muñoz criticou este luns que o Ministerio non emitise ata hai unhas semanas a súa conformidade respecto da proposta de acordo que lle remitiu a Xunta. A Administración autonómica puxéraa sobre a mesa despois dunha reunión celebrada en outubro na que o tres administracións aceptaron a firma do convenio, tal e como lembrou a concelleira ‘popular’.

O PP acusa a Caballero de non dedicar “nin un euro” ao estudo do abastecemento de auga