O BNG de Vigo criticou o “veto sectario” dos socialistas á súa proposta de declaración institucional polos 90 anos do golpe de estado franquista, coa que os nacionalistas pretendían que o pleno condenase o ocorrido e recoñecese ás vítimas. Nun comunicado, o Bloque acusou ao grupo socialista de tombar esta iniciativa, xunto co PP, durante a xunta de portavoces deste mércores, “sen tratar ningunha alternativa ou emenda a pesar da disposición” do BNG para chegar a unha redacción de consenso.

“É unha demostración da falta de compromiso real coa memoria democrática“, apostilou o portavoz do BNG de Vigo, Xabier Pérez Igrexas, quen lamentou o “cinismo sen límites” do alcalde, Abel Caballero, por negarse a aprobar esta declaración cando se cumpren 90 anos do golpe militar de 1936, que deu paso a un “brutal xenocidio” e a unha “cruel ditadura”.

Igrexas criticou que o partido do alcalde de Vigo fusilado, Emilio Martínez Garrido, sexa “incapaz de actuar con coherencia, xenerosidade e altura de miras” ante esta cuestión. “Só produce tristeza”, engadiu, indicando que a defensa da democracia e contra o fascismo conta cun amplo apoio social en Vigo.