O alcalde de Vigo, Abel Caballero, reafirmouse este luns na súa decisión de declarar a situación de prealerta por seca na cidade, e acusou a Xunta de pretender que non se adopten medidas de precaución, así como de querer silenciar a demanda de construír unha nova presa para aumentar a capacidade de almacenamento.

En declaracións remitidas aos medios, o rexedor olívico insistiu en que a situación do encoro de Eiras está 8 puntos por debaixo das reservas de hai un ano, e reiterou que a prealerta é “un estado de atención” e a recomendación de facer un consumo responsable da auga.

Así, rexeitou as acusacións de “discurso apocalíptico” e insistiu en que se trata de “aplicar o sentido común”. “Porque nós estudamos os datos, claro”, asegurou, e lembrou que agora mesmo a situación de Eiras é a “segunda peor da historia”, só por detrás de 2011.