O Pleno do Concello de Vigo deu luz verde este luns a unha moción do PSOE, na que se insta á Xunta e á Deputación de Pontevedra a “poñer cifras concretas” ao compromiso de apoio ao aeroporto de Peinador, e a destinar as mesmas axudas á terminal viguesa que aos aeroportos de Santiago e A Coruña. Tamén reclama que ese apoio económico se transfira á administración municipal. A proposta contou co voto a favor do grupo socialista, que rexeitou as emendas expostas pola oposición; a abstención do BNG; e o voto en contra do PP.
O concelleiro de Facenda, Jaime Aneiros, defendeu a necesidade de que tanto a administración autonómica como a provincial “poñan números” á “cooperación” que están a ofrecer para impulsar o aeroporto da cidade. “O que pedimos é algo moi sensato”, sinalou o edil socialista, que acusou a BNG e PP de pretender “despistar” coas súas emendas. A moción socialista inclúe tamén a petición de que as axudas de Xunta e Deputación “achéguense ao Concello de Vigo para permitir xerar os créditos orzamentarios necesarios cos que instrumentar publicidade coas compañías aéreas, para fomentar a súa implantación no aeroporto de Vigo”.
“10 MILLÓNS GASTADOS” E “NINGUNHA CONEXIÓN FINALIZADA”
O grupo municipal do PP constatou que a actual situación da terminal olívica reflicte a “incapacidade” do goberno local para captar voos e facer valer o liderado de Vigo como motor económico e turístico. Nese sentido, a portavoz popular, Luisa Sánchez, lembrou que, desde que Abel Caballero é alcalde, a cidade gastou “máis de 10 millóns de euros” para conseguir voos, pero “ningunha conexión fidelizada”. “E agora pídenlles aos demais”, afeou, antes de lembrar que, cando Carmela Silva gobernou a Deputación de Pontevedra, o goberno vigués “nunca” lle pediu axuda para rutas aéreas. Luisa Sánchez remarcou que a Xunta ofreceu convenios de colaboración ao Concello para realizar promoción turística en destino, e preguntou se o goberno de Caballero vai desprezar ese ofrecemento. Respecto diso, as súas emendas ían encamiñadas a que a administración municipal solicite ese fondo de captación turística á Xunta e que colabore co comité de cooperación aeroportuaria para captar novas rutas.
AS PROPOSTAS DO BNG
Mentres, o portavoz do BNG, Xabier Pérez Igrexas, chamou a debater sobre política aeroportuaria cunha “perspectiva máis ampla”, xa que o impulso dos aeroportos galegos “non se resolve só a base de talonario público”, e lembrou que a competencia real non se dá entre as terminais galegas, senón entre estas e o aeroporto Sá Carneiro do Porto. Por iso, o grupo nacionalista emendou a moción do PSOE para pedir que sexa a Xunta a que “pague” a promoción turística do aeroporto e para que se busquen sinergias entre as tres terminais galegas. Igualmente, propuxo que Xunta e AENA deseñen un plan de dinamización que inclúa apertura de Peinador 24 horas, mellores accesos ou o mantemento da operatividade de control desde a torre física; e que a Xunta financie unha conexión de bus directa entre o centro urbano e a terminal olívica.
OUTRAS MOCIÓNS
Por outra banda, o Pleno de Vigo aprobou tamén este luns, por unanimidade, unha moción socialista para reclamar á Xunta que destine á Festa da Reconquista a mesma achega económica que o Concello. Tamén se aprobou, co voto en contra do PP e a abstención do BNG, unha moción para instar o goberno galego a manter a actividade asistencial de Atención Primaria no centro de saúde de López Moura e tamén no Nicolás Peña, e que se convoquen as prazas vacantes en todos os centros de saúde e PAC da cidade. Outra das mocións aprobadas foi a esixencia á Xunta para que leve a cabo a cubrición dos patios dos colexios. Pola contra, o grupo socialista fixo valer a súa maioría para que se rexeitasen as dúas mocións da oposición: unha do BNG “contra o militarismo” e para frear as consecuencias da guerra, e outra do PP, pedindo ao goberno local que dialogue e pacte cos veciños de Teis as actuacións municipais no barrio.
