O grupo municipal do BNG de Vigo esixiu este venres ao goberno local que faga público o correo electrónico que a Concellaría de Seguridade remitiu á Policía Local para informarlle de que a atracción do Saltamontes das festas de Matamá en agosto de 2024 (onde morreu un mozo de 36 anos tras romper un dos brazos da máquina) non tiña autorización municipal.

O portavoz nacionalista, Xabier Pérez Igrexas, lamentou que, “573 días despois do accidente” que causou a morte de Iván Castaño, aínda non se coñece por que funcionou o Saltamontes se non tiña permiso municipal e por que non foi precintada a atracción.

Tras a declaración este xoves, como investigado, do xefe da Policía Local, na que recoñecería que os axentes non recibiron orde expresa para precintar o Saltamontes, o que “podería evitar a morte”, Xabier Pérez Igrexas apuntou que tanto a concelleira de Seguridade, Patricia Rodríguez, como o xefe do servizo, Antonio V.M., tamén investigados neste procedemento, “tentaron derivar responsabilidades cara á Policía Local” xustificar nese correo electrónico.