O PP de Vigo acusou ao alcalde, Abel Caballero, de “engano masivo” cos orzamentos de 2025, ao executar “só o 23% dos investimentos previstos”, segundo cálculos dos ‘populares’. Nun comunicado, a presidenta local do PP, Luisa Sánchez, puxo as fochas como exemplo da “nula xestión” do rexedor, que consignou 2,9 millóns de euros para conservar viarios “e só utilizou 435.000 euros e nada dos 7,6 millóns do plan de renovación”.

“A realidade dos números revela as mentiras de Caballero, cun discurso cheo de promesas, pero á fronte dun goberno cunha xestión ficticia e unha incapacidade para executar o prometido”, reprochou Sánchez. Segundo engadiu, dos 112,7 millóns de euros previstos para mellorar a cidade o ano pasado, sumando o crédito inicial e o extraordinario de agosto, “o goberno local apenas foi capaz de executar 28,8 millóns, o que representa un raquítico 23% do total”. “É dicir, menos de 1 de cada 4 euros orzados para obras”, apuntou.

Así, segundo os seus datos, quedáronse sen gastar 90 millóns de euros anunciados para obras e proxectos que “seguen gardados nun caixón”.