O grupo municipal do BNG rexistrou unha moción urxente para o seu debate no pleno do luns coa que reclama a depuración de responsabilidades políticas tras a imputación, en calidade de investigada, da concelleira de Seguridade, Patricia Rodríguez, polo accidente mortal ocorrido na atracción Saltamontes durante as festas de Matamá, en agosto de 2024.
O portavoz nacionalista, Xabier Pérez Iglesias, cualificou a situación da edila socialista como “insustentable para o goberno de Abel Caballero” e reclamou medidas para evitar que feitos semellantes volvan repetirse. “O alcalde ten que dar a cara, ten que dar explicacións á cidade e reaccionar ante un feito gravísimo, como que unha concelleira sexa investigada nun procedemento xudicial”, sinalou.
Desde o BNG consideran que Patricia Rodríguez “non pode continuar nin un minuto máis” á fronte das súas funcións e instan ao goberno local a “deixar de mirar para outro lado”. Os nacionalistas sosteñen que a investigación xudicial apunta a deficiencias graves nos mecanismos de control e seguridade municipais relacionados coa instalación e funcionamento da atracción na que se produciu o accidente.
Neste contexto, o cesamento da concelleira é, para o BNG, “o mínimo” esixible. A formación tamén avanzou que solicitará a creación dunha comisión especial de investigación para esclarecer responsabilidades políticas e administrativas e para analizar o funcionamento dos servizos municipais implicados.
CAMBIOS EN PROTOCOLOS E RECURSOS
A iniciativa inclúe, ademais, a demanda de novos protocolos de inspección e control para a instalación de atraccións de feira e elementos similares, así como a revisión das ordenanzas e instrucións en materia de seguridade aplicables a eventos públicos. Os nacionalistas reclaman igualmente a dotación de persoal e recursos necesarios para garantir un control efectivo neste tipo de celebracións.
A moción será debatida no pleno municipal do luns, onde o BNG espera que o goberno local se pronuncie sobre as medidas propostas tras a imputación xudicial da responsable de Seguridade.
MOCIÓN DO PP
O grupo municipal do PP en Vigo rexistrou unha moción urxente para reclamar a dimisión ou o cesamento inmediato de Patricia Rodríguez, así como a retirada de funcións do xefe da área de Seguridade, Antonio V.M., ambos investigados polo accidente mortal do ‘Saltamontes’. Os populares cualifican a situación de “extremadamente grave” e consideran que a súa citación xudicial é unha proba da “manifesta neglixencia” do goberno local. Segundo a formación, o concello incumpriu as súas obrigacións de control ao non inspeccionar nin precintar unha atracción que carecía da autorización municipal necesaria.
